Bodega en viatge (2 CD)

Resumat

« Apuèi la publicacion del DVD doble Bodega buf de vida !, Desiri partetjar uèi los rencontres variats a l'encòp professionals e umans que m'an bastits. Atal descobriretz al fial d'aqueles dos CD mon trabalh al dintre de formacions coma Montanha Negra, Rasim doç (amb Pèire Boissière e Coco Le Meur), lo Bal du Griffe (amb Laurent Audemard, Aimat Brees e Matèu Vies), lo Duò Nadalenc (amb Aimat Brees) o encara Une Anche Passe ; mas tanben la resulta d'un trabalh mai pedagogic amb l'Escòla de Bodega o Mar e Montanha.

I traparetz tanben l'illustracion del collectatge de Carbonada (Loís Mas) pel Didièr Olive o encara d'unas raras traças escritas sus l'instrument gràcias a sonets del Prospèr Estiu dichs pel Claudi Marti. Lo viatge prendrà còs pels diferents rencontres faits per la bodega e que li balhèron l'escasença de descobrir monds diferents e culturas variadas atal coma las fecas del carnaval de Limós, la gaita galiciana o la zampogna calabresa per parlar sonque d'aqueles. Mas lo que viatja partís d'en cò el e pòrta son repertòri pròpri que serà evoquat notament dins un conte en lenga nòstra illustrat musicalament. »

2 CD, 46 titres.